انت ياللي مربي شعرك

كان عندي النهاردة امتحان طب شرعي, يبدو والله أعلم ان المادة دي مش بعبع في كليات الطب , لكن في الأزهر للأسف الوضع مختلف شوية, خلاصة القول , احنا اتنفخنا بحمد الله , أنا مش هتكلم على الامتحان لأن اللي حصل حصل والحمد لله على كل حال, بس هتكلم على موقف لذيذ اوي حصل النهاردة , كنت قاعد في اللجنة قبل ما ورق الاجابة و الأسئلة يتوزع , وبينما أن جالس اذا بالأخ مصطفى اللي قاعد جنبي في اللجنة بيسألني عن أمر ما فبصيتله و بسمعه , أوم ايه, الراجل رئيس القسم بتعنا شاف الواد مصطفى , ازاي و ازاي بقى , يعني المهم زعق فييا أنا و قاللي اسكت , المهم أنا مطيع سمعت الكلام و سكت , وهنا بقى الشاهد في هذه القصة , المفروض الموضوع خلص, لقيت الراجل رجعلي تاني و جي يقوللي

أنت ياللي مربي شعرك , انت فرحان بشعرك ده ولا ايه!

معرفش ايه اللي خلاه يظن ذلك .على العموم هي ديه نهاية القصة.

الفكرة في حاجة , ده امتحان written دلوقتي يعني جت سليمة ,يعني لو كان شفوي كان زماني شلت “الصفر الزراعي” .
مفيش حل “للعنصرية” بتاعة الشفوي ديه؟ يعني ده امتحان طبي , لسه كمان بقى لما نخش على امتحان القرآن , ممكن أنقصلي بتاع 20 درجة من الـ 50 عشان حوار الشعر.

عموما هو درجات الطب الشرعي للأسف حالتها متدهورة جدا فهضظر آسفا أحلق لأنه أضحى من الواضح أني “اتعلم عليا”.

بسم الله الرحمن الرحيم

أخيرا بقى عندي مدونة , أساسا مكنتش عايز مدونة,كنت عايز أعمل موقع أحط عليه الكام حتت كود بتوعي وخلاص, هو الموضوع ده اتأخر حوالي 4 سنين بس المهم انه حصل أخيرا الحمد لله.

كبداية تعاملي مع الورد بريس و بما إني ناوي المدونة يكون فيها عربي و انجليزي ان شاء الله عملت plug-in للورد بريس تظبط اتجاه النصوص المختلطة “عربي مع انجليزي” , هي لسه تحت التجربة.

للتسهيل على زوار المدونة “اللي لسه مش موجودين أصلا” , الـ textbox الخاص بالتعليقات أضفتله زر يسمح بتغيير اتجاه الكتابة “يمين ليسار و يسار ليمين”, لما ألاقي وقت ممكن ابقى أكتب شوية عن الاضافات ديه ان شاء الله =) .