احفظ يا حمادة , احفظ عشان تبقى شاطر

كنت لسه حالا قاعد بحل حبة MCQ بتاع مادة الأطفال و اتخنقت من كمية الحفظ اللي اكتشفت اني المفروض احفظها , الناس دول نسيو ان في شيء اسمه Reference ممكن ارجعله عشان اعرف منه الأرقام , مش لازم اتنيل أصم كل حاجة

أمثلة بسيطة

1) Formula for approximate average weight
امال أم الـ Growth charts اتعملت ليه؟ , ولا صعبان عليهم ان احنا مش هنحفظ الـ Charts ديه فطلعولنا بحاجة؟

2) الاحتياجات اليومية للطفل بالكيلو كالوري
تعتمد على عمر الطفل و حالته الصحية , وطبعا ليست الا مجموعة من الأرقام غير مرتبطة ببعضها البعض ومع ذلك أبص ألاقي مطلوب مني احفظها لأنها مطلوبة في أحد الأسئلة , يعني بالعربي بيقولي اني لازم أحفظ الأرقام اللي عاملة زي دليل التليفونات , يعني مش الأفضل اني استعمل دماغي استعمال أكتر آدمية ؟

بص على الناس بره عملين ايه, ربنا يستر ومحدش يشوف الجدول بعدين يعجبو و ينزلو علينا في المحفوظات

3) Grading of Asthma
في بتاع 3 أو اربع جدوال لتفيم حالة الربو , عشان أعرف مدى عنف المرض و كيفية علاجه , من شكل الجداول كده أكاد أجزم ان اللي عملها مكنش غرضه اطلافا انها تحفظ , لأني مقنع ان العالم بتوع بره شايفين ان المخ وظيفته التفكير وليس التشوين , بس طبعا الجداول حفظ يا دكتور , يعني لما يجيلك عيان هتلقه ثانية أبص في الجدول؟

وغيره كتييير , انا بس كنت متغاظ جدا و حبيت أفك شوية , هرجع اتنيل أحفظ عشان ابقى شطور

امتحان باطنة MCQ بمستشفى باب الشعرية

هقول ايه بس , دلوقتي الانفجار النووي غير كافي للتعبير عما حدث ,فاخترت هذه المرة الـ “سوبر نوفا“.

قد يظن البعض أني أبالغ كثيرا , لأ مش ببالغ.

اختراع صايع جدا!

الاختراع ده ببساطة هو العدو الطبيعي للكاميرات

عبارة عن Projector بس مش بيشتغل غير لما يلقط فلاش كاميرا بتصور.

محتاج توضيح , نضرب مثال , دلوقتي شخص واقف بيصور الأهرامات مثلا , وتصادف وجود هذا الجهاز على الهرم , أول ما الشخص هيدوس على زرار النصوير الفلاش بينور , يقوم الجهاز “الصايع” ياخد باله من الفلاش و يروح عامل Projection لصورة مسبقة الاعداد , الصورة ديه هيتم اسقاطها على الكاميرا بتاعت الضحية في نفس اللحظة اللي الكاميرا بتلقط فيها الصورة , والنتيجة هتكون ان الضحية لما يشوف الصور اللي صورها يلاقي الصورة بتاعته و عليها الصورة اللي الاختراع ده عملها Projection

http://blog.wired.com/gadgets/2008/06/gun-camera-adds.html
http://blog.wired.com/gadgets/2008/06/exclusive-inter.html

استعمال جوجل كقاموس عربي-انجليزي

الفكرة ببساطة تعتمد على جوجل و موقع Answers.com , لاحظت أن صفحة التعريف بأي كلمة بموقع Answers.com تحوي قائمة بمعنى تلك الكلمة بلغات متعددة , فيمكن استعمال هذه الخاصية كالآتي

Google Query:

site:answers.com كلمة عربية

سيقوم جوجل بالبحث في موقع Answers.com عن “كلمة عربية” وسيعيد قائمة بالصفحات التي تحوي تلك الكلمة و التي ستكون في الأغلب الصفحة التي تخص هذه الكلمة بالموقع و تحوي معنى الكلمة بالانجليزية

استخدمت هذه الخاصية للتوصل لمعنى كلمة “كوسى” في اللغة الانجليزية

site:answers.com كوسى

قافلة لتبسيط علوم الدماغ

احتضنت مدينة الرباط المغربية أسبوعا تعريفيا يبسط علوم الدماغ لعامة الناس نظمته “جمعية العلوم والثقافة للجميع”. وينتقل الأسبوع بين عدة مدن مغربية بهدف توعية عامة الناس بأهمية علوم الدماغ وتعريفهم بهذا العضو وأعراض الأمراض التي يمكن أن تصيبه.

بقية الخبر هنا

الموضوع عجبني بصراحة , بس أخطأت و قريت تعليقات القراء على الموضوع!

في اجماع غريب على ان الحملة سخيفة!

ماشي الموضوع مش “قضية ضاغطة” في الوقت الحالي بس أنا دلوقتي لما آجي أنزل أكلم الناس عن مرض الدرن مثلا يطلعلي واحد يقلي الناس جعانة و حللي أزمة العيش , أقولو ايه؟

ماشي دي مشاكل مهمة فعلا , بس أنا أعمل ايه؟ نقعد في بيوتنا نعيط و خلاص لحد ما مشكلة العيش تتحل؟

تبادل الكلى

أثناء تصفحي لمواقع أقسام الـكلى و المسالك البولية في الجامعات المختلفة صادفت نظام جديد في التبرع بالكلى يطبق لأول مرة في جامعة كاليفورنيا.

لفهم كيفية عمل هذا النظام سأشرح الحالة الواردة بالموقع.

جيسون شاب أصيبت والدته بالفشل الكلوي , جيسون يريد أن يتبرع بكليته لأمه و لكن لا يوجد تطابق كافي بين الأنسجة الامر الذي سيؤدي الي رفض جسم الأم لكلية أبنها جيسون.

تيفاني شابة أصيب والدها بالفشل الكلوي , تيفاني تريد أن تتبرع باحدى كليتيها لأبيها و لكن لا يوجد تطابق كافي بين الأنسجة الامر الذي سيؤدي الي رفض جسم الأب لكلية أبنته تيفاني.

الحل التقليدي هو انتظار حصول كلا المريضين على كلية من شخص متوفي.

الحل موضوع الخبر هو التبادل, بأن يتبرع جيسون بكليته لوالد تيفاني “حيث يوجد تطابق كاف بين الأنسجة في الشخصين” و تتبرع تيفاني بكليتها لوالدة جيسون “حيث يوجد تطابق كاف بين الأنسجة في الشخصين”.

الموضوع الأصلي

انتو مبتقروش ليه؟ مش تبقو تقرو؟

من أكتر الكلمات اللي بتغيظني في كلية طب, يجي الدكتور يخش علينا و يسئل في المحاضرة السابقة اسئلة من صيغة “عدد أسباب كذا و كذا” و لما محدش يجاوب يروح قايل “يا جماعة انتو مبتقروش ليه؟” , أو “ابقو اقرو الدروس أول باول”, الدكتور من حقه يسئل و من حقه برضه ان يزعل ان محدش ذاكر, بس الشاهد هنا كلمة “اقرو”, أنا بتغيظني الكلمة دي أوي , يا ريت نسمي الأشياء بمسمياتها , كليتنا متنفعش فيها القراية,هتنسى , الكلية حفظ , يبقى اللي يجي يسئل المفروض يقول انتو مش بتحفظو أول باول ليه , ابقو احفظو اول باول,الخ…..

أماكن العمل 2.0 و طارد المراهقين

لقيت شوية صور لشكل “المكاتب” الخاصة بأنجح خدمات ما يعرف بالـ Web 2.0 , حاجات زي Facebook و Twitter مثلا

http://uaddit.com/discussions/showthread.php?t=706

الملاحظ ان أغلب العاملين من صغار السن , شيء جميل أوي , يعني من الآخر مش لازم تبقى عجوز و مكحكح و رجلك و القبر عشان تعمل حاجة جديدة او تخترع.

دي من الحاجات اللي مضيقاني في طب , لأنه يبدو والله أعلم ان الاختراعات في هذا المجال حكر على كبار السن “قال يعني الواد هيخترع علاج للحصبة”, معرفش اذا كانت ملاحظتي دي صح ولا غلط.

أقصد بكبار السن من هم أكبر من 40 سنة.

وبمناسبة الاختراعات , اكتشفت بالمصادفة اختراع غريب جدا اسمه Teen repellent يعني “طارد المراهقين” على نسق “طارد الناموس” , الجهاز ده ببساطة جهاز بيطلع صوت مزعج ميسمعوش غير المراهقين “أقل من 20 سنة” أما الناس الأكبر من كدة ميسمعوهوش , ففي بعض مراكز التسوق “Malls” بتستعملوه وده يؤدي الى انزعاج المراهقين دون غيرهم و يضطروا يروحو يقفو في مكان تاني.

الجهاز ده بيعتمد على ظاهرة تعرف بالـ presbycusis وهو فقدان تدريجي لحدة السمع مع التقدم في السن, فالجهاز بيستعمل تردد عند نهاية مدى الترددات المسموعة للبشر , عند كبار السن مدى الترددات بيكون أضيق من الصغار “عشان الـ presbycusis“, وبالتالي يسمعه الصغار دون غيرهم.