هقول ايه بس , دلوقتي الانفجار النووي غير كافي للتعبير عما حدث ,فاخترت هذه المرة الـ “سوبر نوفا“.

قد يظن البعض أني أبالغ كثيرا , لأ مش ببالغ.

من أكتر الكلمات اللي بتغيظني في كلية طب, يجي الدكتور يخش علينا و يسئل في المحاضرة السابقة اسئلة من صيغة “عدد أسباب كذا و كذا” و لما محدش يجاوب يروح قايل “يا جماعة انتو مبتقروش ليه؟” , أو “ابقو اقرو الدروس أول باول”, الدكتور من حقه يسئل و من حقه برضه ان يزعل ان محدش ذاكر, بس الشاهد هنا كلمة “اقرو”, أنا بتغيظني الكلمة دي أوي , يا ريت نسمي الأشياء بمسمياتها , كليتنا متنفعش فيها القراية,هتنسى , الكلية حفظ , يبقى اللي يجي يسئل المفروض يقول انتو مش بتحفظو أول باول ليه , ابقو احفظو اول باول,الخ…..

نتيجة الثانوية العامة طلعت امبارح “أظن الأزهرية نتيجتها طلعت من فترة فليلة برضه” , ربح فيها من ربح و خسر من خسر ده طبعا على اعتبار ان المجموع الكبير “مكسب” , عموما أنا قلت أقول “كلمتين” كده يعني لأي حد بيقرا الكلام ده.

بلاش طب بشري يا عالم
بلاش طب بشري يا عالم
بلاش طب بشري يا عالم

اذا كان حتما ولابد تدرس علوم طبية , عليك و على طب أسنان, دراسة خفيفة و بتنجز و بتطلع تشتغل بالبكاروليوس, طب بشري طريقها طويل بشكل مبالغ فيه , وفي الآخر محتاج على الأقل ماجيستير عشان يبقى عليك القيمة.

تحديث ( 2 سبتمبر 2007 ) : التدوينة ديه فيها المفيد فيما يخص كلية الطب

كان عندي النهاردة امتحان طب شرعي, يبدو والله أعلم ان المادة دي مش بعبع في كليات الطب , لكن في الأزهر للأسف الوضع مختلف شوية, خلاصة القول , احنا اتنفخنا بحمد الله , أنا مش هتكلم على الامتحان لأن اللي حصل حصل والحمد لله على كل حال, بس هتكلم على موقف لذيذ اوي حصل النهاردة , كنت قاعد في اللجنة قبل ما ورق الاجابة و الأسئلة يتوزع , وبينما أن جالس اذا بالأخ مصطفى اللي قاعد جنبي في اللجنة بيسألني عن أمر ما فبصيتله و بسمعه , أوم ايه, الراجل رئيس القسم بتعنا شاف الواد مصطفى , ازاي و ازاي بقى , يعني المهم زعق فييا أنا و قاللي اسكت , المهم أنا مطيع سمعت الكلام و سكت , وهنا بقى الشاهد في هذه القصة , المفروض الموضوع خلص, لقيت الراجل رجعلي تاني و جي يقوللي

أنت ياللي مربي شعرك , انت فرحان بشعرك ده ولا ايه!

معرفش ايه اللي خلاه يظن ذلك .على العموم هي ديه نهاية القصة.

الفكرة في حاجة , ده امتحان written دلوقتي يعني جت سليمة ,يعني لو كان شفوي كان زماني شلت “الصفر الزراعي” .
مفيش حل “للعنصرية” بتاعة الشفوي ديه؟ يعني ده امتحان طبي , لسه كمان بقى لما نخش على امتحان القرآن , ممكن أنقصلي بتاع 20 درجة من الـ 50 عشان حوار الشعر.

عموما هو درجات الطب الشرعي للأسف حالتها متدهورة جدا فهضظر آسفا أحلق لأنه أضحى من الواضح أني “اتعلم عليا”.