من أكتر الكلمات اللي بتغيظني في كلية طب, يجي الدكتور يخش علينا و يسئل في المحاضرة السابقة اسئلة من صيغة “عدد أسباب كذا و كذا” و لما محدش يجاوب يروح قايل “يا جماعة انتو مبتقروش ليه؟” , أو “ابقو اقرو الدروس أول باول”, الدكتور من حقه يسئل و من حقه برضه ان يزعل ان محدش ذاكر, بس الشاهد هنا كلمة “اقرو”, أنا بتغيظني الكلمة دي أوي , يا ريت نسمي الأشياء بمسمياتها , كليتنا متنفعش فيها القراية,هتنسى , الكلية حفظ , يبقى اللي يجي يسئل المفروض يقول انتو مش بتحفظو أول باول ليه , ابقو احفظو اول باول,الخ…..

كان عندي النهاردة امتحان طب شرعي, يبدو والله أعلم ان المادة دي مش بعبع في كليات الطب , لكن في الأزهر للأسف الوضع مختلف شوية, خلاصة القول , احنا اتنفخنا بحمد الله , أنا مش هتكلم على الامتحان لأن اللي حصل حصل والحمد لله على كل حال, بس هتكلم على موقف لذيذ اوي حصل النهاردة , كنت قاعد في اللجنة قبل ما ورق الاجابة و الأسئلة يتوزع , وبينما أن جالس اذا بالأخ مصطفى اللي قاعد جنبي في اللجنة بيسألني عن أمر ما فبصيتله و بسمعه , أوم ايه, الراجل رئيس القسم بتعنا شاف الواد مصطفى , ازاي و ازاي بقى , يعني المهم زعق فييا أنا و قاللي اسكت , المهم أنا مطيع سمعت الكلام و سكت , وهنا بقى الشاهد في هذه القصة , المفروض الموضوع خلص, لقيت الراجل رجعلي تاني و جي يقوللي

أنت ياللي مربي شعرك , انت فرحان بشعرك ده ولا ايه!

معرفش ايه اللي خلاه يظن ذلك .على العموم هي ديه نهاية القصة.

الفكرة في حاجة , ده امتحان written دلوقتي يعني جت سليمة ,يعني لو كان شفوي كان زماني شلت “الصفر الزراعي” .
مفيش حل “للعنصرية” بتاعة الشفوي ديه؟ يعني ده امتحان طبي , لسه كمان بقى لما نخش على امتحان القرآن , ممكن أنقصلي بتاع 20 درجة من الـ 50 عشان حوار الشعر.

عموما هو درجات الطب الشرعي للأسف حالتها متدهورة جدا فهضظر آسفا أحلق لأنه أضحى من الواضح أني “اتعلم عليا”.