كنت لسه حالا قاعد بحل حبة MCQ بتاع مادة الأطفال و اتخنقت من كمية الحفظ اللي اكتشفت اني المفروض احفظها , الناس دول نسيو ان في شيء اسمه Reference ممكن ارجعله عشان اعرف منه الأرقام , مش لازم اتنيل أصم كل حاجة

أمثلة بسيطة

1) Formula for approximate average weight
امال أم الـ Growth charts اتعملت ليه؟ , ولا صعبان عليهم ان احنا مش هنحفظ الـ Charts ديه فطلعولنا بحاجة؟

2) الاحتياجات اليومية للطفل بالكيلو كالوري
تعتمد على عمر الطفل و حالته الصحية , وطبعا ليست الا مجموعة من الأرقام غير مرتبطة ببعضها البعض ومع ذلك أبص ألاقي مطلوب مني احفظها لأنها مطلوبة في أحد الأسئلة , يعني بالعربي بيقولي اني لازم أحفظ الأرقام اللي عاملة زي دليل التليفونات , يعني مش الأفضل اني استعمل دماغي استعمال أكتر آدمية ؟

بص على الناس بره عملين ايه, ربنا يستر ومحدش يشوف الجدول بعدين يعجبو و ينزلو علينا في المحفوظات

3) Grading of Asthma
في بتاع 3 أو اربع جدوال لتفيم حالة الربو , عشان أعرف مدى عنف المرض و كيفية علاجه , من شكل الجداول كده أكاد أجزم ان اللي عملها مكنش غرضه اطلافا انها تحفظ , لأني مقنع ان العالم بتوع بره شايفين ان المخ وظيفته التفكير وليس التشوين , بس طبعا الجداول حفظ يا دكتور , يعني لما يجيلك عيان هتلقه ثانية أبص في الجدول؟

وغيره كتييير , انا بس كنت متغاظ جدا و حبيت أفك شوية , هرجع اتنيل أحفظ عشان ابقى شطور

أثناء تصفحي لمواقع أقسام الـكلى و المسالك البولية في الجامعات المختلفة صادفت نظام جديد في التبرع بالكلى يطبق لأول مرة في جامعة كاليفورنيا.

لفهم كيفية عمل هذا النظام سأشرح الحالة الواردة بالموقع.

جيسون شاب أصيبت والدته بالفشل الكلوي , جيسون يريد أن يتبرع بكليته لأمه و لكن لا يوجد تطابق كافي بين الأنسجة الامر الذي سيؤدي الي رفض جسم الأم لكلية أبنها جيسون.

تيفاني شابة أصيب والدها بالفشل الكلوي , تيفاني تريد أن تتبرع باحدى كليتيها لأبيها و لكن لا يوجد تطابق كافي بين الأنسجة الامر الذي سيؤدي الي رفض جسم الأب لكلية أبنته تيفاني.

الحل التقليدي هو انتظار حصول كلا المريضين على كلية من شخص متوفي.

الحل موضوع الخبر هو التبادل, بأن يتبرع جيسون بكليته لوالد تيفاني “حيث يوجد تطابق كاف بين الأنسجة في الشخصين” و تتبرع تيفاني بكليتها لوالدة جيسون “حيث يوجد تطابق كاف بين الأنسجة في الشخصين”.

الموضوع الأصلي

من أكتر الكلمات اللي بتغيظني في كلية طب, يجي الدكتور يخش علينا و يسئل في المحاضرة السابقة اسئلة من صيغة “عدد أسباب كذا و كذا” و لما محدش يجاوب يروح قايل “يا جماعة انتو مبتقروش ليه؟” , أو “ابقو اقرو الدروس أول باول”, الدكتور من حقه يسئل و من حقه برضه ان يزعل ان محدش ذاكر, بس الشاهد هنا كلمة “اقرو”, أنا بتغيظني الكلمة دي أوي , يا ريت نسمي الأشياء بمسمياتها , كليتنا متنفعش فيها القراية,هتنسى , الكلية حفظ , يبقى اللي يجي يسئل المفروض يقول انتو مش بتحفظو أول باول ليه , ابقو احفظو اول باول,الخ…..

لقيت شوية صور لشكل “المكاتب” الخاصة بأنجح خدمات ما يعرف بالـ Web 2.0 , حاجات زي Facebook و Twitter مثلا

http://uaddit.com/discussions/showthread.php?t=706

الملاحظ ان أغلب العاملين من صغار السن , شيء جميل أوي , يعني من الآخر مش لازم تبقى عجوز و مكحكح و رجلك و القبر عشان تعمل حاجة جديدة او تخترع.

دي من الحاجات اللي مضيقاني في طب , لأنه يبدو والله أعلم ان الاختراعات في هذا المجال حكر على كبار السن “قال يعني الواد هيخترع علاج للحصبة”, معرفش اذا كانت ملاحظتي دي صح ولا غلط.

أقصد بكبار السن من هم أكبر من 40 سنة.

وبمناسبة الاختراعات , اكتشفت بالمصادفة اختراع غريب جدا اسمه Teen repellent يعني “طارد المراهقين” على نسق “طارد الناموس” , الجهاز ده ببساطة جهاز بيطلع صوت مزعج ميسمعوش غير المراهقين “أقل من 20 سنة” أما الناس الأكبر من كدة ميسمعوهوش , ففي بعض مراكز التسوق “Malls” بتستعملوه وده يؤدي الى انزعاج المراهقين دون غيرهم و يضطروا يروحو يقفو في مكان تاني.

الجهاز ده بيعتمد على ظاهرة تعرف بالـ presbycusis وهو فقدان تدريجي لحدة السمع مع التقدم في السن, فالجهاز بيستعمل تردد عند نهاية مدى الترددات المسموعة للبشر , عند كبار السن مدى الترددات بيكون أضيق من الصغار “عشان الـ presbycusis“, وبالتالي يسمعه الصغار دون غيرهم.

النهاردة كان في دكتور بيتكلم عن موضوع الـ Water Hammer Pulse و قال ان في أحد الأساتذة بيحب يسئل في الموضوع ده و بعد كده يسأل يعني ايه Water hammer أصلا , حسب الكلام اللي سمعته النهاردة الـ Water hammer ديه لعبة روماني كانو بيدوها للأطفال أيام الرومان.

المهم بعد البحث على النت ملقتش أي ذكر للعبة ديه , بس اتضح (حسب مافهمت) ان الـ Water Hammer ديه “ظاهرة فيزيائية” بتحصل في المواسير “Pipes” لما يمشي جواها الميه بسرعة و يتم ايقاف جريان المياة بشكل مفاجيء “عن طريق صمام مثلا” أو شيء من هذا القبيل , لما جريان المياه بيوقف بتحصل الظاهرة ديه اللي من أهم نتياجها ان بيحصل خبط و اهتزاز جامد في الماسورة المسكينة دا غير زيادة الضغط جواها.

الموقع ده في فلاشه بتشرح الظاهرة.

(more…)

أخيرا قررت اني أكتب شيء مفيد “أو أرجو أن يكون كذلك” في مدونتي الجامدة, لأ و مش مفيد و بس , مفيد و طبي كمان.
الموضوع اللي هتكلم عنه كان اتفتح في منتدى “ما” و أدليت بدلوي فيه يعني , كان بيتكلم عن النانو تكنولوجي و ان في علماء عملو أنابيب كربونية بمقاييس نانو مترية, اللي أنا أعرفو في الوقت الحالي عن البيونانوتكنولوجي ان في ناس عايزه تعمل “روبوت” بمقاييس و أبعاد نانومترية علما بان

Nanometer = 10^-9 meter

يعني بنتكلم في مقاييس تقارب مقاييس الفيروسات , أو أحجام بعض الانزيمات المعقدة التركيب, عشان تتخيل مدى ضئالة حجم الفيروس “وبالتالي الأبعاد النانو مترية” بص معايا على المثال ده.
العالم بتوع الويكي بيديا بيقولو ان حجم فيروس متوسط الحجم مقارنة بحجم “لامؤاخذة” البرغوت , زي كده مقارنة طول انسان عادي “قول مثلا طوله 175 سم ” بجبل يعادل ارتفاع جبل ايفرست مرتين “ارتفاع جبل ايفرست بتاع 8848 متر يعني مقارب من 9 كيلو متر”, يعني 18 كيلومتر مقارنة بـ 175 سم.

(more…)