Tag, وسم, تاج,Crown… you name it!

هو انا لا بحب التاجات ولا هي بتحبني , بس عشان مكسفش الراجل اللي بعتو فانا هلعب…
 
قوانين التاج :
1.توضيح اسم المدون الى مررلي التاج (محمد محمود) .
2.توضيح قواعد التاج (وقد تم ) .
3.اتكلم عن اهم 6 اسرار في حياتي ربما لن يكتشفها الغرباء
ولنا هنا وقفة , بص , أهم أسرار في حياتي دي لا يمكن طبعا اني هطلعها عشان تاج ولا اتنين ولا عشرة ,أمال ازاي بقت “أهم أسرار في حياتي” لما مع أول قفى أروح جايبهم كلهم
هو أعتقد ان أنسب شيء هو الجزء بتاع “لن يكتشفها الغرباء”, فانا هقول الحاجات اللي في اعتقادي ممكن الغرباء أو اللي ميعرفنيش كويس ميخدش باله منها
4.امرر التاج ل 6 مدونين مع ذكر اساميهم وروابط مدوناتهم ( منعا للاحراج فانا مش همررو لحد , العيال عندها مذاكرة ومش فاضيين ) .
5.اترك تعليق فى المدونة الى همررلها التاج ( بص على 4 ) .

معرفش هقول 6 ولا أقل , بس هحاول

1) قلبي أسود , او على الأقل في جزء معتبر اسود.
2) متشاءم بشكل مريع , أحيانا التشاؤم ده بيؤذي الناس اللي حواليه بشكل ما , بيحبطهم يعني
3) مش اجتماعي اطلاقا , ربما يخظئ الشخص اللي أنا اتعرفت عليه مثلا ويفتكرني اجتماعي عشان انا اتعرفت عليه.
4) بخاف من الصراصير “فعلا يعني” و خاصة الكبيرة منها و يا سلام لو بتطير , تبقى كابوس…
5) معتد بنفسي أوي , على الأقل بيني و بين نفسي , ممكن تسميه غرور.

أظن باقي الصفات اللي فاضله ممكن أي حد بقليل من الفراسة يعرف يفقسها …