تاج من السيد الدكتور خالد أبو الفضل

أحب أشكر السيد الدكتور خالد أبو الفضل على البتاع اللي بعته, هحاول أجاوب عليه بأكبر قدر ممكن من التناكة,ﻷني مش مستلذ محتوياته

انت مين؟
مصطفى محمد ابراهيم, مش بعرف أتكلم عن نفسي فمش هتكلم.

مين أكتر 6 شخصيات بتحبها ؟
سؤال مخنق للغاية, ليه؟ لأنه عامل زي أسئلة الامتحانات, ملوش غير اجابة واحدة صح!
أخشي أني لا أملك اجابة شافية على هذا السؤال, خليه بعدين بقى

هل أنت سعيد؟
الحمد لله

لو اجتمعت مع حسني مبارك هتقوله إيه؟
السؤال ده بحاول اجاوب عليه من وانا صغير , كنت ديما أتخيل نفسي من العيال الصغيرة اللي بتطلع تستلم جايزة من الريس عشان حفظين القرآن, وكل مكبر نظرتي للموضوع تتغير وأفضل برضه مش عارف أقول ايه ولا ايه, هو كده كده لو قلتلي “لو اجتمعت مع عم شحاته الطرشجي هتقوله ايه” مش هعرف أجاوب ,أنا أصلي مش من النوع اللي بيعرف يحضر كلام يقوله.

لو معاك مليون ونص هتعمل بيهم إيه؟
حاجات كتير,هظبطلي حببت gadgets كده, موبايل على لاب توب , والباقي هبقى أفكرله في حاجه بس هما ييجو الأول

بتحب مصر؟
ممكن تقول ان الإجابة “نعم” مع الكثير من التحفظات.

بتحب البنات؟
السؤال ده ممكن الاجابة عنه بناءا على اعتبارات كثيرة
هجاوب على السؤال من الناحية الاجتماعية فبصفتي شخص مدهول فاقدر أقول ان الاجابة هي “لأ” بالفم المليان
طبعا أرجو ان محدش يفسر ده على انه اضطهاد للمرأة و عنصرية , اه حاكم الناس اصلها بتتلكك

انت مسلم؟
الحمد لله.

ليه؟
ارادة ربنا, ولدت لأب و أم مسلمين فاصبحت مسلما زي كل المصريين , بس بعمل ما بوسعي حتى لا أكون مسلما “في البطاقة” بس والله الموفق.

ايه أكتر موقف محرج اتعرضت ليه ؟
في مواقف كتير بس اللي فاكره اني كنت في مدرسة في الكويت وانا صغنن وكنت “وما زلت” مدهول لا اعرف بنات ولا عايز أعرفهم , كنا لسه في ابتدائي , وقام احد اخواننا الأفاضل بكتابة جواب “لا أدري او لا أذكر فحواه” لواحدة من البنات اللي معانا في الفصل باسمي , لأ و جم على الدحاحة اللي في الفصل , كانو تقريبا بيحاولو يخلقو شقاق بين أفراد الطبقة الكادحة في المجتمع.
حتى يومنا هذا أنا فاكر بصة الازدراء اللي بصيتهالي .
موقف طفولي أهبل! هو ده اللي موجود اذا كان عجبك.

واتصرفت ازاي ؟
والله منا فاكر , بس مظنش اني عملت اي حاجه, مدهول كالعادة.

ايه الأمنية اللي بتدعي ربنا يحققهالك؟
يكون وجودي في الدنيا ذو قيمة , يعني مكنش كمالة عدد.

المفروض اني أحدف البتاع ده على بني آدم تاني, أنا معرفش حد أصلا غير كام نفر هبعتلهم وكلهم بيدرسو طب.

السيد أدهم الشهابي .

السيد أحمد الألفي.

السيد خالد حسني.

تعديل “الجمعة 6 يوليو”

صديقي محمود ربيع اللي يا عيني معندوش مدونة لسه قام بالإجابة على الأسئلة وهنشرها هنا

من أنت ؟
السؤال صعب بس أنا بنى ادم ضايع اسمى محمود طالب فى كلية الذل والهوان وأكبر معقل للحفظ وال لا فهم اسمها
كلية الطب وشوف بقى لو ده طب الأزهر

مين أكتر 6 شخصيات بتحبها؟
اشمعنى ستة يعنى بس عموما بحب ابويا وأمى

هل أنت سعيد؟
حاليا أنا خايف ومش عارف سغيد ولا لأبس انا سعيد بالأجازة

لو اجتمعت مع حسني مبارك هتقوله إيه؟
اه سؤال يودى أمن الدولة حدفبس لواجتمعت بيه ركبى هتخبط فى بعض بس ممكن أقوله ربنا معاك يا ريس وكده مابقاش منافق وموديش نفسى فى داهية

لو معاك مليون ونص هتعمل بيهم إيه؟
جينا للمهم هعمل عيادة كويسة واشتر شقة وعربية مايكونش فاضل غير العروسة واكمل 3 ع ونصف

بتحب مصر؟
والله السؤال ده سألته لنفسى كتير وأعتقد الاجابة ممكن تكون قاسيةبس انت تقصد ايه بمصر بتاعتنا ولا بتاعتهم

بتحب البنات؟
مافهمتش السؤال

انت مسلم؟
اه يا عم الحاج قدامك اسمى محمود

ليه؟
حلوة ليه ده بس يمكن علشان ربنا بيحبنى وربنا يقدرنا على شكره

ايه أكتر موقف محرج اتعرضت ليه ؟
صراحة مش فاكر كتيربس الموقف الأكثر إحراجا لا أملك الجرأة على كتابته وله علاقة بالبنات ومتفهمش غلط بس فاكر موقف قريب لما رئيس قسم الطب الشرعى زعقلى يوم امتحان الشفوى والعملى من غير سبب وبعدين لقيت نفسى هامتحن عنده شفوى المهم الامتحان عبارة عن لجنتين وكان الأستاذ الاخر مع رئيس القسم فى نفس الغرفة فامتحنت الأول عند الدكتور الاخر وفجأة لقيت القسم بيقول للدكتور (الواد ده قاعد يطنطط من الصبح وواخد فى نفسه مقلب ومش عاجبه أحد ) أنا مش عرف قاله كده ليه يمكن لقانى بجوب فمهانش عليه اخد درجة كويسة المهم أنا وشى كان كالكركم وشعرى وقف وحسيت انى هضيع اصل أنا لسه هامتحن عنده المهم لما دخلت امتحن عنده ماستريحش غير لما سألنى سؤال ماعرفتوش وطبا اتظبت فى الليلة ده

واتصرفت ازاي ؟
سلمت أمرى لله وجاوبت على قد ما قدرت وحولت اعتذر له فى الأخر بس نفضلى يعنى من الأخر الامتياز ضاع

ايه الأمنية اللي بتدعي ربنا يحققهالك؟
أن يجعلنى سببا لنصرة الاسلام والمسلمين

الى هنا انتهي كلام محمود ربيع.